وين الكاج......! - موقع الشاعر كريم خلف جبر

...وين الكاج
دليني اعلى دربج وين
يل مالج محط بالكاع
يالهفه وحرارة البيج
ديرم والعطر نعناع
ياكحله على جالي العين
بيهامن السحر انواع
يارطبة نخل كنطار
احنص بيها كلمن جاع
ياسجه على بحر الشوك
مرسومه برمش دمّاع
ياوردة وسموم الكيظ
ركّدها ومحاها بساع

معذور الذهب شيكول

ماتبرج لمعته بين لماع

وعلى الصوبين ياقوتات

وبنصهن شذر ملتاع
وانا المحتام اسولف بيج
انتي وياي وانه وياج
...وين الكاج
-------------------

يارمشج شواطي الليل
مظلم والعيون وساع
وحلامي اعلى جرف العين
تغمض ليش
شو جنها تريد اوداع
ذوبني الحزن والشوك
حتى الشوك
بيه من الوكت اطباع
ونه وكلبي اظل محتار
حيرّني وحرت بهواج
...وين الكاج
-------------------

يا جمرةواحضنج بيش
مشلول الشليل ومامش ذراع
ياعركة غريب ويلتفت وين

مابين الردايه الصارت اسباع
يهون عليج اظل وحدي
انا ودمعي
اهواها الدموع وحيل طماع
اعاتب والزمن ياحيف
أنشدج وين هذا الوكت وداج
...وين الكاج

--------------------