.
.
الاحد, 03 فبراير, 2008
الك منّك طويلة اشكد مسافات
ولا بيهن ابد يعراك لوفات
مشيت ومن جزاني الشوف رديت
رسمتك عالارض وحسبت خطوات
أتيه ما اظن مكلوب الحساب
تسافر ليش هم مثلي المحطات
شكبانك حزن ياكلبي اشبيك
كوم بكوم بين الكوم طركات
شيوصلني وكل للروح شبرين
بعدنه جم بعد مل وجزه وفات
ولا اوصل اظل محتار برجاك
زاعلت الفرح ومن الزعل مات
وكول اشلون ارسمك بيش يالون
ولو لونك حمار وبيه جويات
ولو عافوك ربعك بس يتيهون
لان انت الوحيد البيك آيات
مدفونه بتراب الشوك يعراك
من بان وبنت يابو السلالات
فرق مابين حالك ذهب ينسام
ولا بالسوم شيل هواي لنكات
لجن هانت وكلّك خل يزعلون
ولا يهمّك شماته هواي شمّات
يبو وجه الفليح يصبح الخير
ويرد بالخير مصباحك تحيات
يبو خلك السمه الماخبصته الريح
اشما مرت عليك تصير صفنات
يبركان البحر معروف من تهيج
مو بركان كاع يصير خفتات
لون تدري الامم جا فكرت زين
وكلهم ياأمم عيدوا الحسابات
دشوفوا هناك ضجه وغاد تفجير
ولا بيهم يحل هاي النزاعات
اذا رادوا سلم خلهم يسلمون
عليك وتنتهي كل الخلافات
عزفنه على الكلب باوتار الكلوب
نشيدك موطني تغني الحمامات
اظل اشعر وسولف بيك للدوم
ولا عوفّك ابد يازين لحظات
واذا جان الشعر ميضمّد جروح
يظل مثل الفراغ ابّين جلمات
واشوف الشعر لم الليل سهران
يكلي هناك ودني بحضنه أنبات
وكول الله مهيّوب ويهابوك
صكر ميلوحك البالكاع هيهات
تظل محبس تدور ابين الكلوب
مو بجفوف كلبي يصيح لا بات
أضف تعليقا
أضف تعليقا
<<الصفحة الرئيسية
.
.